Қазақстан Республикасының
Ұлттық баскетбол федерациясы

3х3 баскетболдан Қазақстан ерлер құрамасы U-23 Әлем Кубогының топтық кезеңіндегі алғашқы екі ойында қарсыластарынан жеңіліп қалды

06.10.2022    Оқылғаны: 284
Дереккөз: Баспасөз қызметі
Румыния астанасы Бухарестте 3х3 баскетболдан 23 жасқа дейінгі спортшылар арасындағы әлем кубогі басталды. Аталған турнирге Қазақстан командасы да қатысып жатыр. Өкінішке қарай, D тобында сынға түсетін қазақстандықтар алғашқы жарыс күніндегі екі ойында да жеңіліп қалды. 

3х3 баскетбол әлемдік аренада жаңадан бедел жинап келе жатқан спорт түрі. Халықаралық Олимпиада комитетінің  шешімімен Олимпиада бағдарламасына енген соң, аталған спорт түрінің екінші тынысы ашылғандай. 2020 жылғы Токио ойындарында алғаш рет 3х3 баскетболдан жеңімпаз бен жүлдегерлер анықталды. Бүгінде Халықаралық федерация (FIBA) жастар ерекше қызығатын, кезінде көше ойынына баланып, бүгінде әлемдік деңгейге көтерілген 3х3 баскетболды дамытудың түрлі жолдарын қарастыруда. Соның бірі – U23 дейінгі жастар арасындағы әлем кубогі. 

Аталған турнирдің тарихы айтарлықтай терең емес. 23 жасқа дейінгі жастар арасындағы әлем кубогі алғаш рет 2018 жылы Қытайдың Сиань қаласында ұйымдастырылды. Жарыстың соңғы жеңімпазы – қазіргі таңда барлық ресми жарыстардан шеттетілген Ресей құрамасы.  

Invitati de marca din baschetul mondial la FIBA 3x3 U23 World Cup 2022 de  la Bucuresti
Бухарест төрінде барлығы 20 команда өнер көрсетуде. Олар төрт топқа бөлінген. Қазақстан құрамасы Германия, Сербия, Катар және Израильмен бірге D тобында өнер көрсетуде. Жарыс ережесі бойынша, әр топтағы командалар бір-бірімен өзара ойнап шығады. Кейін ең көп ұпай жинаған екі команда плей-офф кезеңіне жолдама алып, тиісінше финалға шыққан құрамалар анықталады. 

Әлем кубогінде Қазақстан намысын төрт ойыншы қорғап жатыр. Олар – Сиднейсейіт Айханов («Ураган» БК), Темірлан Жүнісов («Аstana Tigers» БК), Әділхан Марат («Барсы Атырау» БК) және Рүстем Лұқманов («Irbis» БК). Команданы Илья Коптелов жаттықтырады. 


Әлем кубогіндегі алғашқы матчты қазақстандықтар Германияға қарсы өткізді. Бұл кездесу неміс ойыншыларының айқын басымдығымен өтті. Қарсылас тарапынан ең көп ұпай жинаған Сиди Бейкам тоғыз рет көзге түсті және тоғыз допты да бір ұпайлық межеден енгізген. 

Ал Қазақстан командасы сапынан ең көп ұпай жинаған – Әділхан Марат. Ол бес рет бір ұпайдан алса, бір рет айып алаңынан көзге түсті. Темірлан Жүнісов 4 ұпай алса, Рүстем Лұқманов 2 ұпай еншіледі. 

Қорытынды есеп – 22:13, Германия құрамасының жеңісі. 

Марат Адильхан | Сборная Казахстана по баскетболу 3х3 | Кубок Мира U-23 2022
Әлемдік жарыстағы екінші ойында қазақстандықтар Сербияға қарсы шықты. Өкініштісі сол, бұл жолы да Коптелов командасының жолы болған жоқ. Бұл жолы қазақстандықтар қарсыласқа 16:21 есебімен жол берді. Қазақстан сапынан Темірлан Жүнісов -5, Рустам Лұқманов – 5, Әділхан Марат – 4, Сиднейсейіт Айханов 2 ұпай иеленді. 

Қарсыластар қатарынан Милош Антич 9 ұпай алса, Никола Ковачич – 7,Никола Лацич – 4, Алекса Стоянвич – 1 ұпай еншіледі. 

Қорытынды есеп – 16:21, Сербия құрамасының жеңісі. 

Қазақстан командасының келесі ойыны 8 қазанға жоспарланған. Біздің қарсыластарымыз – Израиль және Катар құрамалары. 

Әлем кубогі 9 қазанда мәреге жетеді.

Қазақстан Ұлттық құрамасының баскетболдан 3х3 U-23 Әлем Кубогы қатысуы, команда құрамы, турнирлік кестелер, кесте және матч нәтижелері туралы толық ақпарат біздің сайттың Құрамалар бөлімінде жарияланған.

Қазақстанның Ұлттық баскетбол федерациясы ҚР мәдениет және спорт министрлігіне, Спорт және дене шынықтыру істері комитетінің спортты дамыту дирекциясына, Ұлттық Олимпиада комитетіне, "Самұрық-Қазына" ұлттық әл-ауқат қорына, "Sport Qory" туризм және спорт индустриясын қолдау қорына турнирге команданы дайындауға көрсеткен қолдауы мен көмегі үшін алғысын білдіреді.

Біздің сайттағы жаңалықтарды оқып, қазақстандық баскетболға қатысты барлық шаралар туралы хабардар болыңыздар. Instagram, Facebook, Vkontakte әлеуметтік желілері мен YouTube арнамызға жазылыңыздар.


Подписывайтесь на нашу рассылку!