3х3 U-23 баскетболдан Қазақстан ерлер құрамасы Бухарест қаласында (Румыния) өтетін Әлем Кубогына қатысады

U-23 жас санатындағы 3х3 баскетболдан Қазақстан Республикасының ерлер құрамасы Әлем Кубогына қатысады. Бүгін, 3 қазанда Астана қаласында спортшылардың оқу-жаттығу жиындары аяқталып, ертең команда Бухарест қаласына (Румыния) аттанады, онда олар 5 - 9 қазан аралығында бақтарын сынайды.

3х3 баскетбол әлемдік аренада жаңадан бедел жинап келе жатқан спорт түрі. Халықаралық Олимпиада комитетінің  шешімімен Олимпиада бағдарламасына енген соң, аталған спорт түрінің екінші тынысы ашылғандай. 2020 жылғы Токио ойындарында алғаш рет 3х3 баскетболдан жеңімпаз бен жүлдегерлер анықталды. Бүгінде Халықаралық федерация (FIBA) жастар ерекше қызығатын, кезінде көше ойынына баланып, бүгінде әлемдік деңгейге көтерілген 3х3 баскетболды дамытудың түрлі жолдарын қарастыруда. Соның бірі – U23 дейінгі жастар арасындағы әлем кубогі. 

Аталған турнирдің тарихы айтарлықтай терең емес. 23 жасқа дейінгі жастар арасындағы әлем кубогі алғаш рет 2018 жылы Қытайдың Сиань қаласында ұйымдастырылды. Жарыстың соңғы жеңімпазы – қазіргі таңда барлық ресми жарыстардан шеттетілген Ресей құрамасы.  


Бухарест төрінде барлығы 20 команда өнер көрсетуде. Олар төрт топқа бөлінген. Қазақстан құрамасы Германия, Сербия, Катар және Израильмен бірге D тобында өнер көрсетуде. Жарыс ережесі бойынша, әр топтағы командалар бір-бірімен өзара ойнап шығады. Кейін ең көп ұпай жинаған екі команда плей-офф кезеңіне жолдама алып, тиісінше финалға шыққан құрамалар анықталады. 

Ойыншылар: 

• Айханов Сиднейсейт, БК "Uragan"
• Джунусов Темирлан, БК "Аstana Тigers"
• Марат Адильхан, БК "Барсы Атырау" 
• Лукманов Рустам, БК "Irbis"

Жаттықтырушысы - Илья Коптелов.

Ойын кестесі:

6 қазан:

• 15:30 - Қазақстан vs Германия
• 17:45 - Қазақстан vs Сербия

8 қазан:

• 15:30 - Қазақстан vs Катар
• 17:45 - Қазақстан vs Израиль

Қазақстан Ұлттық құрамасының баскетболдан 3х3 U-23 Әлем Кубогы қатысуы, команда құрамы, турнирлік кестелер, кесте және матч нәтижелері туралы толық ақпарат біздің сайттың Құрамалар бөлімінде жарияланған.

Қазақстанның Ұлттық баскетбол федерациясы ҚР мәдениет және спорт министрлігіне, Спорт және дене шынықтыру істері комитетінің спортты дамыту дирекциясына, Ұлттық Олимпиада комитетіне, "Самұрық-Қазына" ұлттық әл-ауқат қорына, "Sport Qory" туризм және спорт индустриясын қолдау қорына турнирге команданы дайындауға көрсеткен қолдауы мен көмегі үшін алғысын білдіреді.

---

Біздің сайттағы жаңалықтарды оқып, қазақстандық баскетболға қатысты барлық шаралар туралы хабардар болыңыздар. Instagram, Facebook, Vkontakte әлеуметтік желілері мен YouTube арнамызға жазылыңыздар.