Армандар орындалады. Тұңғыш қазақстандық әйел төреші әлем чемпионатында қазылық етіп жатыр

Австралияның Сидней қаласында әйелдер арасындағы әлем чемпионаты жалғасып жатыр. Биылғы жарысқа 23 арбитр төрелік етсе, соның 12-сі – әйел төреші. Біздің елдің атынан Яна Никогосян «жасыл құрлыққа» атанған.
 
32 жастағы Яна 2019 жылдан бастап жасыл лицензия алған. Ол тұңғыш рет әйелдер арасындағы әлем чемпионатында төрелік ету мүмкіндігіне ие болды. Яна Никогосян бытырғы әйелдер арасындағы Азия Кубогы, биылғы 17 жасқа дейінгі жасөспірімдер арасындағы әлем чемпионаты мен Сербиядағы әйелдер арасындағы әлем чемпионатына іріктеу турнирінде өзін білікті, кәсіби төреші екенін көрсете алды.
 
Төрелік етуді Яна бала кезінен армандаған. Оның әкесі - Матевос Никогосян кәсіби төреші болып, Қазақстан тарихындағы тұңғыш ФИБА рефериі болған еді.
 
18 жасынан бастап баскетбол ойынына төрелік етуді қолға алған Яна Никогосян еліміздің тарихындағы ФИБА-ның тұңғыш әйел төрешісі атану мақсатын қояды.
 

Яна 27 жаста болғанда әкесі дүниеден өтеді. Сол кезден бастап ол өмірін толықтай төрелік қызметке арнайды.
 
"Ол мені мақтан тұтады деп өзіме уәде бердім. Міндетті түрде ФИБА төрешісі боламын дедім. Мен шынында да төрелік етуді, баскетбол ойынын қатты жақсы көремін", - дейді Яна.
 
ФИБА-ның гендерлік саясатының арқасында жыл санап әйел төрешілердің саны артып келеді. Былтыр бұл көрсеткіш 50 пайызға артқан.
 
"Ойыншыларға қойылатын талаптар өзгеріп отырады. Төрешілерде ондай өзгерістерге дайын болуы керек. Сондықтан да ФИБА біздің кәсіби біліктілігімізді арттыру үшін көп нәрсе істеп жатыр. Психологиялық дайындық сияқты ойын тұстарын қамтитын түрлі   вебинарлар өткізеді", - дейді Яна Никогосян.
 
Яна Никогосян баскетболға төрелік еткісі келетін болашақ әріптестеріне де бір-екі ауыз сөзін арнады.
 
"Мен енді ғана төрелікті қолға алған әйелдер қауымына бір ғана нәрсе айтқым келеді. Өз ісіңді сүймесең, нәтиже болмас. Бұл ойынға деген махаббатсыз, төреші болу мүмкін емес Сондықтан да өзіңді үнемі жетілдіріп, дамытып отыру керек", - деді қазақстандық төреші.


Естеріңізге сала кетейік, баскетболдан әйелдер арасындағы әлем чемпионаты қыркүйектің  22-сі басталып, қазанның 1-де аяқталады.

---

Біздің сайттағы жаңалықтарды оқып, қазақстандық баскетболға қатысты барлық шаралар туралы хабардар болыңыздар. Instagram, Facebook, Vkontakte әлеуметтік желілері мен YouTube арнамызға жазылыңыздар.