Елорданың оң жағалауында “Астана" КБК академиясының жаңа залы ашылды

Бүгін "Астана" кәсіби баскетбол клубы академиясының жаңа залы салтанатты тұсаукесер рәсімі өтті.

Айта кету керек, спорттық алаң ата-аналардың көптеген өтініштері бойынша ашылды. Жабық манеж елорданың оң жағалауында тұратын балаларға Қазақстанның үздік баскетбол клубының жүйесінде шұғылдануға мүмкіндік береді. Жаңа нысанда акамедия тәрбиеленушілерінің жаттығуынан басқа,"Астана" баскетбол клубының фарм-командасының ойындары да өтеді.


Залдың ашылу салтанатына ҚР Ұлттық баскетбол федерациясының президенті Абай Алпамысов, "Астана" клубының бас директоры Самсон Аракелян, сондай-ақ Қазақстан ерлер құрамасының және "Астана" КБК негізгі құрамының баскетболшылары: Руслан Айтқали, Асқар Майдекин, Константин Нефф, Даниил Аксенов және Андрей Литвиненко қатысты. ҚР ҰФБ президенті Абай Алпамысов жиналғандарды осы мерекемен құттықтады.


- Құрметті баскетбол сүйер қауым және ойыншылар, бүгін біз бәрімізге ортақ баскетболшылардың спорт нысанының ашылуына қатысып отырмыз. Мұнда тек кәсіби қазақстандық баскетболшылар ғана емес, біздің балалар да жаттығатын болады. Өйткені, олар біздің болашағымыз. Академияның бұл залы қазақстандық баскетболды дамытуға үлкен мүмкіндіктер береді. Залды дайындау жұмыстары шамамен екі жыл бұрын басталды. Бүгін "Астана" клубының бас директоры Самсон Аракелянның қажырлы еңбегінің арқасында Нұр-Сұлтанда екінші залды ашып отырмыз. Әрине, демеушілердің қаржылық қолдауынсыз біз мұны жасай алмас едік, барлық демеушілерге рахмет! "SportQory"спортты қолдау қорына жеке алғысымызды білдіреміз.

Жабық манеждің ашылу салтанатына "SportQory" спортты қолдау қорының бас директоры Асхат Сейсембек те қатысты.


- Жақында ғана Сізді федерация президенті лауазымына сайлады. Және бүгінгі күннің өзінде қазақстандық баскетболдың өміріндегі осындай маңызды оқиға орын алып отыр. Мен бұл жетістікпен барлық ата-аналар мен балаларды құттықтағым келеді. Өйткені, бұл база, жас ұрпаққа арналған үй. Бірнеше жыл бұрын, біз осы клубты корпоративті басқаруға алған кезде, біздің міндеттеріміздің бірі балалар академиясын ашу болғандығы есімде. Біз бұл туралы айттық, сөйлестік және бірнеше айдың ішінде біз оны жүзеге асырдық. "Астана" клубының директоры Самсон Аракелянға алғысымды білдіремін. Бірақ бұл тек бастамасы ғана, біз жаңа деңгейге көтерілеміз деп үміттенемін. Баршаңызды құттықтаймын!

Осыдан кейін жаңа алаңда клубтың черлидерлері мен тәрбиеленушілері өнер көрсетті. Қонақтар ойыншылармен суретке түсіп, қолтаңба алды, ал журналистер баскетболшыларға өздерін қызықтырған сұрақтарын қойды.

"Астана" КБК баскетбол академиясының жаңа залы Нұр-Сұлтан қаласы, Тәуелсіздік көшесі, 30 мекен-жайында (Майлин көшесінің қиылысында) орналасқан.

---

Біздің сайттағы жаңалықтарды оқып, қазақстандық баскетболға қатысты барлық шаралар туралы хабардар болыңыздар. Instagram, Facebook, Vkontakte әлеуметтік желілері мен YouTube арнамызға жазылыңыздар.