Қазақстан Республикасының
Ұлттық баскетбол федерациясы

3х3 баскетболдан Қазақстан командасы Бухаресттегі әлем кубогін аяқтады

09.10.2022    Оқылғаны: 584
Дереккөз: Баспасөз қызметі
Румыния астанасы Бухарестте 3х3 баскетболдан 23 жасқа дейінгі спортшылар арасындағы ең ірі жарыс – әлем кубогі өтіп жатыр. Бүгін аталған сында топтық кезеңдер аяқталды. Өкінішке қарай, Қазақстан құрамасы өз тобындағы ең соңғы орында қалып, турнирдің жартылай финалына өте алған жоқ.

3х3 баскетболдан U-23 жастар арасындағы әлем кубогі аталған спорт түріндегі үздіктердің басын қосты. Төрт топқа бөлінген 20 команда бір-бірімен өзара ойнап, әр топта үздік шыққан екі құрама жартылай финалға жолдама алады. Әлемдік бәсекеге Қазақстан командасы да шақырту алды. Бұл сында Қазақстан намысын Рүстем Лұқманов, Сиднейсейіт Айханов, Әділхан Марат және Темірлан Жүнісовтер қорғады.

Алғашқы екі ойында қазақстандықтар 13:22 есебімен Германияға және 16:21 есебімен Сербияға жол берген болатын.

Топтық айналымдағы кезекті жарыс күнінде қазақстандықтар Катар мен Израильге есе жіберді. Енді екі ойынға кеңірек тоқталайық.

Рустем Лукманов | Сборная Казахстана по баскетболу 3х3 | Кубок Мира U-23 2022
Қазақстан – Катар

Ойын барысы: Катармен өткен кездесу Қазақстан командасы үшін тез аяқталды. Ойынның басталғанына небары 8 секунд өткенде катарлықтар есеп ашып үлгерді. Біздің спортшылар алыс нүктеден ұпай алуды көздегенімен, бұл талпыныстары сәтсіз аяқталды. Екінші ұпайды да қарсыластар иеленді. Рүстем Лұқманов тағы да екі ұпайлық нүктеден допты лақтырғанымен, қиыс кетті. Осы аралықта қазақстандық спортшылар тез жинала білді. Әділхан Марат пен Темірлан Жүнісовтен шабуылды нәтижелі аяқтап, есепті теңестірді. Бірақ қарсыластар бірден екі ұпайлық межеден жауап беріп, тағы да алға шықты.

Бұл кездесуде есеп біраз уақытқа дейін тең келе жатқан. Алайда, ойын ортасынан асқанда катарлықтар біршама алға кетті. Десе де, қазақстандықтар есеп айырмасын қысқартуға барынша тырысты. Әділхан Марат айып добын сәтті орындап, 2 ұпай сыйласа, Темірлан Жүнісов өзіне берілген екі мүмкіндікте де торға бір допты дарыта алды. 17:19 есебі тіркелген кезде қазақстандықтар бір-біріне пас беруде өрескел қате жіберді. Соның салдарынан, катарлықтар екі ұпайлық межеден допты дәл енгізіп, кездесуде жеңіске жетті. Есеп – 17:21.

Шешуші сәт: Қазақстан мен Катар бір деңгейдегі командалар. Бұл кездесуде қарсыластардың екі ұпайлық межеден допты жиірек енгізгені және қазақстандықтардың ойын соңына қарай қателікке бой алдырғаны маңызды рөл ойнады.

Матч кейіпкері: Бұл матчта Темірлан Жүнісов 8 ұпай жинады. Айып добын орындау кезінде мүлт кетсе де, командаға ең көп ұпайды осы ойыншы әкелген.

Салдары: Бірінші жарыс күніндегі екі матчта да жеңіліп, ұпай ала алмаған Қазақстан командасы үшін өзімен деңгейлес Катардан ұтылу жақсы болмағаны анық. Бұл команданың  турнир кестесінде төменде қалу мүмкіндігін арттыра түсті.

Сиднейсеит Айханов | Сборная Казахстана по баскетболу 3х3 | Кубок Мира U-23 2022
Қазақстан – Израиль

Ойын барысы: Бұл матчты израильдіктер қарқынды шабуылмен бастады. Бірақ қазақстандықтар да тартынып қалған жоқ. Дереу есепті теңестірді. Өкініштісі сол, Әділхан Марат айып добын орындау сәтінде мүлт кетті. Сондай-ақ, Темірлан Жүнісов, Сиднейсейіт Айхановтардың екі ұпайлық межеден лақтырған добы да торға түспей, қиыс кетіп жатты. Ал израильдіктер ойын барысындағы мүмкіндіктерін де, айып добын да сәтті пайдала білді. Таблодағы есеп 3:10-ды көрсеткенде, қазақстандықтар тайм-аут алды. Азғантай үзілістен соң қарсыластар тізгінді берген жоқ. Біздің команданың бір ұпайына олар екі ұпайлық межеден жауап берді. Сол себепті, олар ұпай саны жөнінен екі есе басымдық танытқан болатын. Бұл матчтағы соңғы екі ұпайды Қазақстан сапынан Темірлан Жүнісов иеленді, содан соң изарильдіктер шешуші допты енгізіп, жеңіске жетті. Есеп – 10:21.

Шешуші сәт: Бұл кездесуде Израиль ойыншылары шеберлік, жылдамдық, тәжірибе, тіпті, бойының ұзындығынан да алда болды.

Матчтың кейіпкері: Әдеттегідей, команда үздігі Темірлан Жүнісов құраманы алға сүйреуге тырысты. Бұл жолы ол 4 ұпай еншілеген.

Салдары: Бұл ойын Қазақстан командасының әлем кубогінің топтық кезеңінде ұпай жинауына түбегейлі мүмкіндік берген жоқ. Қазақстандықтар бірде-бір ұпай жинай алмай, жарысты аяқтады.

Қорытынды: D тобында Сербия командасы бірінші орын алса, Германия екінші орын иеленіп, екі құрама ширек финалға жолдама алды. Топтық сынды Израиль үшінші, Катар төртінші, Қазақстан бесінші орында аяқтады.

Қазақстан Ұлттық құрамасының баскетболдан 3х3 U-23 Әлем Кубогы қатысуы, команда құрамы, турнирлік кестелер, кесте және матч нәтижелері туралы толық ақпарат біздің сайттың Құрамалар бөлімінде жарияланған.

Қазақстанның Ұлттық баскетбол федерациясы ҚР мәдениет және спорт министрлігінеСпорт және дене шынықтыру істері комитетінің спортты дамыту дирекциясынаҰлттық Олимпиада комитетіне"Самұрық-Қазына" ұлттық әл-ауқат қорына"Sport Qory" туризм және спорт индустриясын қолдау қорына турнирге команданы дайындауға көрсеткен қолдауы мен көмегі үшін алғысын білдіреді.

Біздің сайттағы жаңалықтарды оқып, қазақстандық баскетболға қатысты барлық шаралар туралы хабардар болыңыздар. Instagram, Facebook, Vkontakte әлеуметтік желілері мен YouTube арнамызға жазылыңыздар.


Подписывайтесь на нашу рассылку!